Mabondia wa ngumi za kulipwa Karim Mandonga , Dula Mbabe na Ibrahim Class wanatarajiwa kuwasili Zanzibar kesho mchana katika Bandari ya Malindi kwa ajili ya kupima uzito kwa maandalizi ya uzinduzi wa mchezo wa ngumi hapa Zanzibar.
Hayo yamefahamika wakati Meneja masoko wa Kampuni ya Tosh sport Bi Amitin Mbamba akiambata na uongozi wa kamisheni ya ngumi za kulipwa Zanzibar na Idara ya michezo walipofika Afisi ya Mkuu wa Mkoa wa MjinI Magharib kuelezea kuhusu uzinduzi wa mchezo huo .
Amefahamisha kuwa mara mabondia hao watakapowasili watazunguka katika viunga vya maeneo mbalimbali ya Zanzibar na siku ya Jumamosi kutakuwa na tukio la kupimwa uzito kwa mabondia hao litakalofanyika katika viwanja vya mnara wa Mapinduzi Square Michenzani.
Amewataka wananchi wa Mkoa wa Mjini Magharibi hususani vijana na wanamichezo kujitokeza kwa wingi katika mapokezi wa mabondia hao pamoja na tukio la kupimwa uzito
Nae Mkuu wa Mkoa wa Mjini Magharib Mhe. Idrissa Kitwana Mustafa ameipongeza Kamisheni ya ngumi za Kulipwa Zanzibar pamoja na Tosh sport kwa kuandaa vyema uzinduzi wa mchezo huo na kuahidi kuwa Mkoa utatoa mashirikiano yake ili kuhakikisha mashindano hayo yanafanikiwa.
Aidha ameeleza kufarajika kwake tukokana na uzinduzi huo kufanyika ndani ya Mkoa Mjini Magharibi na kusema kuwa wameujengea heshima Mkoa huo.
Uzinduzi rasmi wa mchezo wa ngumi hapa Zanzibar utafanyika siku ya jumapili ya tarehe 27 mwezi huu katika viwanja vya Mao ze Dong.
